Cirita dari Bobara Bakar, Bagea, Sampe Salak Tagulandang

Oleh: Denni Pinontoan

Hari Kamis malam kita brangkat ka Tahuna, voor mo pi hoba kasing tu mahasiswa Fakultas Teologi UKIT yang ba PPL di sana. Dari pelabuhan Manado, nae kapal Terra Sancta. Sampe di pelabuhan tahuna jam 5 pagi.

Tu tampa pertemuan deng mahasiswa da beking di Jemaat GMIST “Smirna” Kolongan Beha. Tu jemaat itu pas di kaki gunung Awu, yang terakhir da meletus taon 2004 itu. Lantaran stou di kaki gunung jadi depe tanah subur. Warga di situ ja batanam macam-macam tanaman pangan.

Makang siang, de pe menu macam-macam. Ada udang goreng yang dorang da tangka di kuala, ikang bakar, ayam kampung rampa-rampa ransak, kong depe makanan penutup nenas dari da ambe dari dorang pe kobong.

Pertemuan deng mahasiswa da klar sekitar jam ampa sore. Pulang di tampa da turus akang, kong makang malam. De pe menu lei memang khas pesisir. Ikang bobara bakar, dabu-dabu lilang. Makang deng tangan, kong da pancing sadiki cap tikus da seludup dari Manado. Abis makang bacirita deng dua pendeta GMIST. Sampe lat, kira-kira sampe jam 12.

De pe besok, bangong pagi, voor siap-siap smo pulang. Abis mandi, smokol dulu. Tetap masih ada ikang bobara bakar. Makang lei deng tangang.

Pulang ka Manado nae kapal capat, Bahari Ekspres de pe nama tu kapal. Laju dia ja lari. Mar sadiki kancang kwa tu lao. Mar, lantaran so musti pulang, ya akhir pulang jo...Dasar orang gunung, waktu so di tengah lao, sadiki jo bakuwai.

Singga di Siau. Tu kapal da kase turung deng nae penumpang. Abis itu singga lei di Tagulangdang. Tanta-tanta deng om-om pe laju skali maso di kapal. Dorang ba jual salak. Salak Tagulandang. Basar-basar kong manis-manis. Kita bli harga Rp. 7.500. Voor oleh-oleh pa maitua, ta pe anak, deng tamang-tamang di Tomohon. Mar kote, waktu di Tahuna, mahasiswa da kase oleh-oleh bagea Tahuna.

Sampe di rumah so jam 7 malam. So lelah, maar masih berusaha ba internet. ....