Manado pe Panas, Basuar!

Denni Pinontoan pe tulisan

Panas. Basuar. Mar, sebenarnya dorang bilang bagus kata kalu masih ja basuar. Bagus for kesehatan. Tambah lei di Tomohon so kadang ja basuar.

Manado, hari ini memang panas. Waktu kita tanya pa maitua yang dulu da ba kos di Manado sekitar 6 taon, dia bilang memang so lebe panas kata. So lebe panas dari dulu. Tu kita pe kacili, Echa, cuek dapa lia. Mar, tetap katu dia minta polo. “Pa, polo dang,” dia ba minta deng sunggu-sunggu.

Depe mama tanya,”Kiapa Echa? So lala?” Echa yang tu da tanya akang cuma badiam. Bukang dia blum mangarti tu depe mama da tanya, mar dasar anak-anak katu toh, dia suka depe papa gendong.

Torang waktu itu, ada ampa orang. Kita, maitua, Echa, deng Echa pe mama ani. Ba jalang rame-rame. Mar tu jalang, di lorong sebelah Speed komputer, di Bahu itu balubang-lubang. “Di jalang ini, tu brapa minggu lalu kita ada cilaka akang. Da ba gonceng, lantaran tu jalang ba lubang-lubang, kita ciri. So capat lei tu motor, kong jalang ba lubang lei,” Echa pe mama ani bacirita.

Tu Echa pe mama ani kwa, beberapa minggu lalu memang da cilaka di jalang ba lubang itu. Sampe kasiang maso rumah saki. Depe pala-pala riki da manjae.

Mar skrang kita kwa mo cirita tu panas.

Kita singga di Speed Computer. Di situ ada internet ja sewa. Bole pake WIFI, bole pake LAN. Kita pake WIFI. Lantara Echa pe mama ani, waktu blum ba pindah pa dia pe tampah kos skarang, langganan di situ. Masih ada depe voucher yang ta sisa sekitar sapuluh jam. Kita pake itu.

Di dalam warnet itu, depe panas, memang dapa tako. Kita pikir-pikir, apakah lantaran kita orang gunung, lahir di Kawangkoan, besar di Motoling, kong skarang tinggal di Tomohon, kong sampe dapa rasa skali Manado pe panas? Ato Manado memang so lebe panas. Lantara global warming stou, dorang bilang. Global Warming ato pemanasan global. Kita lei blum tahu jelas. Yang kita tahu, pante Manado, depe reklamasi panjang skali. Hampir sepanjang pantai teluk Manado itu. Dari Bahu, sampe blakang Jumbo.

“Mar, itu bukang kwa timbun pante. Depe nama itu, reklamasi, re-claim. Klaim ulang kata, tu garis pante yang sebenarnya,” bagitu tu salah seorang profesor pakar kelautan dari Unsrat bilang waktu ada seminar di UKIT brapa waktu lalu.

Oh, bagitu kang. Bukang mo kase kacili tu pante, mar cuma mo kase iko ulang tu garis pante kata. Kita dapa tahu kamari terakhir, tu profesor kote itu, salah satu Tim AMDAL, waktu pemerentah Manado mo reklamasi tu pante itu. Pantasan dia tahu mo balas kita pe pertanyaan.

Mar, ngoni samua tahu toh, tanggal 11 sampe 14 Mei lalu, di Manado ada acara basar. World Ocean Conference (WOC) deng Coral Triangle Initiative (CTI) Summit depe nama. Di acara itu tuang-tuang basar dari ratusan negara bakumpul, dengar-dengar kata, da bahas soal laut deng persoalan tu dunia ini yang so lebe panas. Dari Manado ada kata yang mo kase sumbang for dunia. Mantap!

Lantaran tu soal panas Kota Manado ini, dari speed computer kita batulis di pa kita Facebook pe dinding bagini: “Manado memang panas. Mar....ini komang so lebe panas...basuar so bukang suar lela...mar so suar global warming…”

Cuma brapa menit, muncul komen-komen.

Andre Gusti Bara bilang,”so bagitu manado. kan demi kota pariwisata dunia, salah satu dp syarat musti cuaca panas minta ampun.”

Kita balas di tampa komen itu, ”Pantasan...ternyata kote...lebe panas...menurut pemerentah lebe bagus...supaya tu proposal tembus di PBB...ha...ha...”

Sammy Fanly Tumbelaka tamang orang Kawangkoan mar skrang ja mancari di Amurang bilang, “+ ley RW p paso.. Puuaannaass katu ya.. :-).”

Dia bilang RW, kita dapa inga, tadi kote, waktu masih online pa Echa pe mama ani pe tampa kos, kita da bilang pa dia di chating, kita sementara makang RW Manado yang lanut.

Erlangga Mario Kansil Runtuwene, mahasiswa Fakultas Teologi UKIT di komen itu bilang, ”tapi mener...masih bitung komang lebeh panas....”

”Iyo kang. Bitung kwa panas dari dulu....ha..ha..” kita balas depe komen.

Renly Najoan, tamang di FB (kependekan dari Facebook) ba komen, ”setuju... sedangkan di tomohon sekarang so ja cari es.”

Tu tamang lama yang skarang sementara ja mancari katu di Gorontalo ba tambah, ” ato suar..............aaa.aaaaa,” tulis Rudolf Lumy.

Greenhill Glanvon Weol, dari Minut da buka kote FB pake HP. Dia bilang, ”Maka 'torang samua basu..ar'”.

Mar, kita pe cirita ini, memang bukang cuma soal tu panas (suhu yang panas) itu, mar lei tu malimbukunya Kota Manado dari segi politik, ekonomi deng sosial. So baku cako depe persoalan. “So bagini no, tu kota kosmopolitan,” bagitu tu mahasiswa Unsrat pe komentar di warnet speed. Waktu itu dia da di seblah pa kita. Sama-sama sementara online.

Waktu lalu ada diskusi di Pusat Gerakan Adat dan Budaya Minahasa di Tomohon. Di situ tu Majelis Adat Minahasa (MAM), Persatuan Adat Minahasa deng Perpustakaan Minahasa “AZR” Wenas da batampa akang. Depe pokok diskusi seputar Kota Manado, yang so mulai kata nda kentara tu depe Minahasa. Sampe tu cirita berkembang ada manuver-manuver politik dari kata tu Plt. Walikota skarang, yang so nda anggap tu Kota Manado bagian dari Tanah Minahasa. Kita tanya pa orang-orang yang hadir waktu itu,”kalo torang mo bilang Manado skarang ini harus Minahasa lagi, no apa depe penanda,?” Artinya, kira-kira apa yang torang bole bilang sebagai tanda, bahwa Kota Manado adalah bagian dari Tanah Minahasa. Sebab, dia skrang kan tampa tinggal dari macam-macam orang. Ada dari Gorontalo, Sangihe, Talaud, Bolangmongondow, Arab, Cina, deng banyak lagi.

Teddy Kumaat, salah satu yang hadir di acara bacirita itu bilang, ”Gedung Minahasa Raad, depe tanda.”

Tu tamang, yang kita cuma inga dia pe fam Maramis bilang, perlu skali kata tu hukum adat. “Supaya torang mo klaim secara hukum adat, bahwa Manado adalah bagian dari Tanah Minahasa,” bagitu dia bilang.

Di sei pa kita ada Christy Manarisip. Kita tanya pa dia,”Kota Manado pe lambang masih pake burung Manguni?”

“Nyanda no,” dia bilang.

“Pantasan,” kita bilang pa dia. Mar tu laeng-laeng di acara bacirita itu, nda da dengar stou kita da bilang itu. Soalnya kita pe suara cuma stengah.

Butul. Lambang Kota Manado nda burung Manguni. Mar katu, nda ada lei burung pompo (merpati) sama deng tu lambang Kab. Minahasa Tenggara yang Bupati Telly Tjangkulung da usul itu. Lambang Kota Manado masih ada kelapa. Mar yang depe nama lambang, ya lambang, simbol. Biar lei pake Minahasa pe lambang, kalu tu hati so balaeng, sama jo kang!